كتب _ الضوي أحمد:
صرخة مدوية أطلقها أهالي قرية دنديط التابعة لمركز ميت غمر بمحافظة الدقهلية، من الإهمال الجسيم الذي يتعرضون له.
يقول الأهالي في شكوى جديدة تعكس معاناة المواطنين مع مشكلات البنية التحتية، الشوارع والخواري تعوم في بحر من مياه الصرف الصحي، مما حوّل حياتنا إلى معاناة يومية.
يقول أحد سكان قرية دنديط: “إحنا بقالنا فترة كبيرة بنعاني من طفح مياه الصرف الصحي في الحواري والشوارع، لدرجة إن الطرق بقت غرقانة ومبقيناش عارفين نمشي بشكل طبيعي، الموضوع بقى خطر على صحتنا وصحة أولادنا، بسبب الروائح الكريهة وانتشار الحشرات.”
وأضاف: “قدمنا شكاوى أكتر من مرة، لكن مفيش حل جذري لحد دلوقتي، وكل اللي بيحصل حلول مؤقتة وبترجع المشكلة تاني. بنطالب المسؤولين بسرعة التدخل، لأن الوضع بقى لا يُحتمل.”
وتابع: “المياه بقت داخلة على البيوت في بعض المناطق، وده بيهدد سلامة المنازل، غير الخسائر اللي بيتعرض لها الأهالي بسبب تلف الممتلكات.”
ويأمل أهالي القرية في تحرك عاجل من الجهات المختصة، لإنهاء الأزمة ووضع حل نهائي لمشكلة الصرف الصحي، حفاظًا على الصحة العامة وكرامة المواطنين.
